पञ्चायतको ‘जनपक्षीय’ उम्मेदवार हुँदै २०४३ सालमा जिल्ला पञ्चायतको सभापति बनेका राजेन्द्र प्रसाद पाण्डे नेपाली राजनीतिमा संघर्षशील र नेतृत्व क्षमताले परिचित नाम हो । उहाँले पञ्चायतदेखि बहुदलीय व्यवस्था हुँदै गणतन्त्रसम्मको यात्रामा कुशल नेतृत्व क्षमता प्रदर्शन गर्दै आउनु भएको छ । आफू पदमा रहँदा वा नरहँदा जिल्लाका विकास निर्माण तथा समृद्धिका लागि अहोरात्र खट्ने पाण्डे जिल्लामा विकासवादी नेताको छवि बनाउनु भएको छ । ग्रामीण विकासमा स्नातकोत्तर पूरा गर्नु भएका उहाँ प्रखर वक्ता, प्राज्ञिक र अनुभवी नेताका रूपमा आम जनतामाझ परिचित हुनुहुन्छ । भूमिगत संघर्षका क्रममा राजनीतिक दमनको सामना गर्दै उहाँले ६ वर्ष जेल जीवन बिताउनु भएको छ । धादिङको विकासका लागि ४ दशकभन्दा लामो समयदेखि अहोरात्र योगदान गरिरहनु भएका पाण्डेले आफ्नो जीवन नै देश र जनताको पक्षमा समर्पण गर्नु भएको छ । २०७८ सालमा बागमतीको मुख्यमन्त्री हुँदा उहाँले प्रदेश सरकार सञ्चालन, नीति निर्माण, विकास योजना र प्रशासनिक सुधारमा उल्लेख्य भूमिका खेल्नुभयो । उहाँकै नेतृत्वमा धादिङ जिल्लाले भौतिक संरचनासँगै स्वास्थ्य, शिक्षाजस्ता क्षेत्रमा आमूल परिवर्तन गर्न सफल भएको छ । प्रदेशसभा सदस्य, संघीय सांसद, संविधानसभा सदस्य, मन्त्री र मुख्यमन्त्री हुँदा उहाँले जिल्लाको विकास र समृद्धिका लागि खेलेको भूमिका अतुलनीय छ ।